இரவில் தூக்கம் வராமல் யோசித்துக்கொண்டே இருக்கிறீர்களா? இதை முயற்சி செய்து பாருங்கள்

பகல் நேரத்தில் நமக்கு நிறைய வேலை இருக்கும். போன், வேலை, வீட்டு வேலை, குழந்தைகள், பேச வேண்டியவர்கள் என்று மனதுக்கு எப்போதும் ஏதாவது ஒரு வேலை இருந்துகொண்டே இருக்கும்.

ஆனால் இரவு படுக்கையில் தலை வைத்ததும் மட்டும் மனசு அமைதியாகிவிடும் என்று நினைத்தால், பல நேரங்களில் அப்படி நடப்பதில்லை. அப்போதுதான் காலையில் நடந்த ஒரு சின்ன விஷயம் ஞாபகம் வரும். “நான் அப்படி சொல்லியிருக்க வேண்டாமோ?” அதற்குப் பிறகு நாளைக்கு செய்ய வேண்டிய வேலை நினைவுக்கு வரும். “அதை எப்படி முடிப்பது?” அடுத்து பணம் பற்றிய கவலை. வீட்டைப் பற்றிய கவலை. குழந்தையைப் பற்றிய கவலை. இன்னும் நடக்காத ஒரு விஷயத்தையே மனம் முன்னாடியே எடுத்துக்கொண்டு உட்கார்ந்துவிடும். கடிகாரத்தைப் பார்த்தால் 11.30.

“சரி, இப்போவாவது தூங்கணும்.” என்று போனை கீழே வைத்துவிட்டு கண்களை மூடுவோம். ஐந்து நிமிடம் கழித்து மீண்டும் அதே யோசனை.இப்படித்தான் சில இரவுகள் போய்க்கொண்டிருக்கும். இதில் ஒரு விஷயம் கவனிக்க வேண்டியது இருக்கிறது.தூங்க வேண்டும் என்று நம்மை நாமே அதிகமாக கட்டாயப்படுத்தும்போது, தூக்கத்தைப் பற்றிய கவலையே இன்னொரு கவலையாக மாறிவிடலாம்.

அதனால் தூக்கத்தோடு சண்டை போடுவதற்குப் பதிலாக, மனதை கொஞ்சம் மெதுவாக நடத்திப் பார்க்கலாம்.

இரவில் மட்டும் ஏன் இவ்வளவு யோசனை வருகிறது?

பகலில் நம்முடைய கவனம் பல விஷயங்களில் பிரிந்து கிடக்கும். வேலை, குடும்பம், போன், பயணம் என்று மனதுக்கு ஓய்வு இல்லாமல் இருக்கும். இரவில் சுற்றியிருக்கும் சத்தம் குறைந்ததும், அந்த எண்ணங்கள் நன்றாக கேட்க ஆரம்பிக்கலாம். அதனால் இரவில் யோசனை வருவது என்றாலே ஏதோ பெரிய பிரச்சனை இருக்கிறது என்று அர்த்தமில்லை.

வேலை அதிகமாக இருந்திருக்கலாம். சொல்லாமல் வைத்திருந்த ஒரு விஷயம் இருக்கலாம். நாளை பற்றிய கவலை இருக்கலாம். ஒருவரிடம் பேச வேண்டும் என்று நினைத்தும் பேசாமல் விட்டிருக்கலாம். இதுபோன்ற எண்ணங்கள் சில நேரங்களில் இரவில் மீண்டும் மீண்டும் வரலாம். அப்போது “ஏன் நான் இப்படியே யோசித்துக்கொண்டிருக்கிறேன்?” என்று உங்களை நீங்களே திட்டிக்கொள்வதைவிட, “இப்போது என் மனதில் என்ன ஓடிக்கொண்டிருக்கிறது?” என்று கவனிப்பது கொஞ்சம் உதவியாக இருக்கலாம்.

1. தூக்கம் வர வேண்டும் என்று கட்டாயப்படுத்தாதீர்கள்

“எனக்கு இப்போ தூக்கம் வரணும்…”, “நாளைக்கு சீக்கிரம் எழுந்திருக்கணும்…”, “இன்னும் எத்தனை மணி நேரம்தான் தூங்க முடியும்?” என்று தூக்கத்தைப் பற்றியே யோசித்துக்கொண்டிருந்தால், மனதுக்கு இன்னொரு வேலை கிடைத்துவிடுகிறது. படுக்கையில் படுத்தவுடன் உடனே தூங்க வேண்டும் என்று உங்களுக்குள்ளேயே ஒரு போட்டி வைக்காதீர்கள்.

கண்களை மூடி அமைதியாக இருக்கலாம். உடலை தளர்த்தலாம். தூக்கம் வந்தால் தூங்கலாம். தூக்கம் என்பது நாம் பிடித்து இழுத்து வரக்கூடிய விஷயம் இல்லை. “நான் இப்போது ஓய்வெடுக்கிறேன்” என்று நினைப்பது, “நான் இப்போதே தூங்க வேண்டும்” என்று கட்டாயப்படுத்துவதைவிட மனதுக்கு எளிதாக இருக்கலாம்.

2. மனதில் ஓடிக்கொண்டிருப்பதை ஒரு காகிதத்தில் எழுதிப் பாருங்கள்

நாளைக்கு செய்ய வேண்டிய மூன்று வேலைகள் இருக்கிறது என்று வைத்துக்கொள்வோம். அதை மறந்துவிடக்கூடாது என்று பயந்து, படுக்கையிலும் அதை மனதுக்குள் வைத்துக்கொண்டிருக்கலாம். அதற்குப் பதிலாக ஒரு காகிதத்தில் எழுதிவிடுங்கள். “காலை அந்த phone call செய்ய வேண்டும்.” “மளிகைப் பொருட்கள் வாங்க வேண்டும்.” “அந்த வேலை முடிக்க வேண்டும்.” அவ்வளவுதான். அதை எழுதி வைத்துவிட்ட பிறகு, “இதை மறந்துவிடக்கூடாது” என்று மீண்டும் மீண்டும் நினைத்துக்கொண்டிருக்க வேண்டிய அவசியம் குறையலாம்.

சில நேரங்களில் நமக்கு உடனடி தீர்வு தேவையில்லை.மனதில் இருக்கும் விஷயத்திற்கு ஒரு இடம் கொடுத்தாலே போதும்.

மேலும் படிக்க: மனதை யாரிடமும் சொல்ல முடியவில்லையா தினசரி டையரி எழுதிப் பாருங்கள்

3. “இன்னும் ஐந்து நிமிடம்” என்று போனை எடுத்துக்கொள்ளாதீர்கள்

“இன்னும் ஐந்து நிமிஷம் மட்டும் போனைப் பார்க்கலாம்” என்று நினைத்துதான் பல நேரங்களில் போனை கையில் எடுப்போம். அந்த ஐந்து நிமிஷம் முடிந்ததும் போனை கீழே வைத்துவிடலாம் என்று நினைப்போம். ஆனால் ஒரு Reel முடிந்ததும் இன்னொன்று வந்துவிடும். யாரோ ஒரு message அனுப்பியிருப்பார்கள். அதை பார்த்த பிறகு இன்னொரு video கண்ணில் படும். “சரி, இதை மட்டும் பார்த்துட்டு போனை வைக்கலாம்…” என்று நினைத்துக்கொண்டே இருப்போம். ஒரு கட்டத்தில் மீண்டும் கடிகாரத்தைப் பார்த்தால், அரை மணி நேரம் கடந்துபோயிருக்கும்.

அப்போது போனை கீழே வைத்தாலும் மனம் உடனே அமைதியாகிவிடாது. இன்னும் கொஞ்ச நேரத்திற்கு முன்பு பார்த்த video, வந்த message, படித்த செய்தி என்று ஏதாவது ஒன்று மனதில் ஓடிக்கொண்டே இருக்கலாம். குறிப்பாக ஏற்கனவே மனதில் நிறைய எண்ணங்கள் இருந்தால், இந்த நேரத்தில் போனை தொடர்ந்து பார்ப்பது தூக்கத்திலிருந்து நம்முடைய கவனத்தை இன்னும் தள்ளிக்கொண்டு போகலாம். குறிப்பாக ஏற்கனவே மனதில் நிறைய எண்ணங்கள் இருந்தால், இந்த நேரத்தில் போனை தொடர்ந்து பார்ப்பது தூக்கத்திலிருந்து நம்முடைய கவனத்தை இன்னும் தள்ளிக்கொண்டு போகலாம்.

அதனால் இரவு படுக்கைக்குச் சென்ற பிறகு போனை கொஞ்சம் தள்ளி வைக்க முயற்சி செய்யலாம். முதல் நாளிலேயே பழக்கம் மாறிவிடாது. போனை எடுக்க வேண்டும் என்ற எண்ணம் வரும். அது இயல்புதான். ஆனால் அந்த எண்ணம் வந்த ஒவ்வொரு முறையும் உடனே போனை எடுக்காமல் சில நிமிடங்கள் அமைதியாக இருந்து பாருங்கள். சில நேரங்களில் நமக்கு தேவையானது இன்னொரு video அல்ல.

மனதுக்கு கொஞ்சம் அமைதியாக இருக்கும் நேரம்தான்.

4. நாளைக்கு நடக்கப்போகும் விஷயத்தை இன்றிரவே தீர்த்து வைக்க முயற்சி செய்யாதீர்கள்

இரவு நேரத்தில் மனம் சில நேரங்களில் நாளைய பிரச்சனைகளுக்கு இன்றே பதில் கண்டுபிடிக்க முயற்சி செய்யும். “அவர் இப்படிச் சொன்னால் நான் என்ன பதில் சொல்வது?” “அந்த வேலை முடியவில்லை என்றால்?” “அப்படி நடந்தால் என்ன செய்வது?” ஒரு கேள்விக்கு பதில் தேடும்போது இன்னும் இரண்டு கேள்விகள் வந்து நிற்கும். ஆனால் நாளை உண்மையில் என்ன நடக்கும் என்பது நமக்குத் தெரியாது. இப்போது உங்களால் செய்யக்கூடியது ஏதாவது இருந்தால் அதை எழுதிவையுங்கள். மீதியை நாளைக்கு விட்டுவிடுங்கள்.நாளைக்கு சொந்தமான கவலையை இன்றிரவே தூக்கிக்கொண்டு படுக்க வேண்டிய அவசியமில்லை.

5. உடலை கொஞ்சம் தளர்த்திப் பாருங்கள்

மனதில் நிறைய எண்ணங்கள் ஓடிக்கொண்டிருக்கும்போது, நம்முடைய உடலும் அதை வெளிப்படுத்திக்கொண்டே இருக்கும். தோள்கள் இறுக்கமாக இருக்கலாம். முகத்தில் ஒரு சிறிய பதற்றம் இருக்கும். சில நேரங்களில் பற்களைக்கூட அறியாமலேயே இறுக்கமாக வைத்திருப்போம். படுக்கையில் படுத்த பிறகு ஒரு நிமிடம் உங்கள் உடலை கவனித்துப் பாருங்கள். “நான் இவ்வளவு இறுக்கமாக இருக்கிறேனா?” என்று உங்களுக்குள்ளேயே கேட்டுக்கொள்ளுங்கள்.

படுக்கையில் அமைதியாக படுத்துக்கொண்டு, உடலில் இருக்கும் இறுக்கத்தை கொஞ்சம் கொஞ்சமாக கவனியுங்கள். தோள்களில் இருக்கும் அழுத்தத்தை விட்டுவிட்டு, முகத்தையும் இயல்பாக தளர்த்திப் பாருங்கள். தெரியாமலேயே பற்களை இறுக்கமாக வைத்திருந்தால், அதையும் மெதுவாக விட்டுவிடுங்கள். உடலை முழுவதுமாக தளர்த்த வேண்டும் என்று முயற்சி செய்ய வேண்டியதில்லை. எங்கே இறுக்கமாக இருக்கிறதோ அதை மட்டும் கவனித்து, அங்கே கொஞ்சம் நிம்மதியாக இருக்க அனுமதித்தாலே போதும்.

அந்த நேரத்தில் வேறு ஏதாவது எண்ணம் மனதில் வந்துவிட்டால் அதைப் பற்றி கவலைப்பட வேண்டாம். “இதை நினைக்கக்கூடாது” என்று அந்த எண்ணத்துடன் போராடத் தேவையில்லை. மனம் வேறு எங்கோ சென்றிருப்பதை கவனித்துவிட்டு, எந்த அவசரமும் இல்லாமல் உங்கள் கவனத்தை மீண்டும் மூச்சின் பக்கம் கொண்டு வாருங்கள். மனதில் வரும் ஒவ்வொரு எண்ணத்தையும் நிறுத்தி, மனதை முழுவதுமாக வெறுமையாக வைத்திருக்க வேண்டும் என்பதல்ல இங்கே முக்கியம். எண்ணங்கள் வரலாம், போகலாம். அவற்றை அப்படியே விட்டுவிட்டு, உங்கள் கவனத்தை மெதுவாக மீண்டும் அமைதியின் பக்கம் கொண்டு வருவதுதான் முக்கியம்.

மனதை முழுவதுமாக காலி செய்வது நோக்கம் இல்லை. அது எங்கே போகிறது என்பதை கவனித்து, மெதுவாக திரும்பக் கொண்டுவருவதுதான்.

6. இரவு நேரத்தில் பெரிய முடிவுகளை எடுக்காதீர்கள்

இரவு நேரத்தில் சில பிரச்சனைகள் நிஜத்தைவிட பெரியதாகத் தோன்றலாம். பகலில் பார்த்தால் சாதாரணமாகத் தோன்றிய ஒரு விஷயம், இரவு தனியாக இருக்கும்போது மிகவும் தீவிரமாகத் தோன்றலாம். அந்த நேரத்தில் கோபத்தில் message அனுப்புவது, பெரிய பண முடிவு எடுப்பது, வேலை பற்றிய அவசர முடிவு எடுப்பது போன்றவற்றைத் தவிர்க்கலாம். முடிந்தால் ஒரு இரவு தூங்கிவிட்டு மறுநாள் காலையில் அதே விஷயத்தைப் பாருங்கள். பிரச்சனை மாறாமல் இருக்கலாம். ஆனால் அதை எதிர்கொள்ளும் உங்கள் மனநிலை மாறியிருக்கலாம். சில நேரங்களில் நமக்கு புதிய தீர்வு தேவையில்லை. அதே பிரச்சனையை அமைதியான மனதுடன் பார்க்கும் ஒரு காலைதான் தேவை.

7. முடிந்த அளவு ஒரே நேரத்தில் தூங்கும் பழக்கத்தை வைத்துக்கொள்ளுங்கள்

இன்று இரவு 10 மணிக்கு படுத்து, நாளை 1 மணிக்கு படுத்து, மறுநாள் 11.30 மணிக்கு படுத்தால் தூக்கத்துக்கான ஒரு நிலையான பழக்கம் உருவாக சிரமமாக இருக்கலாம். அதனால் தினமும் முடிந்த அளவு ஒரே நேரத்தில் படுக்கவும், ஒரே நேரத்தில் எழவும் முயற்சி செய்யலாம். முதல் நாளிலேயே மாற்றம் தெரியும் என்று எதிர்பார்க்க வேண்டாம். சில பழக்கங்களுக்கு உடலும் மனமும் பழகுவதற்கு நேரம் தேவைப்படும். அதனால் இரண்டு நாட்கள் முயற்சி செய்துவிட்டு விட்டுவிடாமல், தொடர்ந்து சில நாட்கள் கவனித்துப் பாருங்கள்.

8. பகலில் உடலை கொஞ்சம் சுறுசுறுப்பாக வைத்திருங்கள்

நாள் முழுவதும் ஒரே இடத்தில் உட்கார்ந்து வேலை செய்துவிட்டு, இரவு படுக்கைக்குச் சென்றதும் உடலும் மனமும் உடனே அமைதியாகிவிட வேண்டும் என்று எதிர்பார்க்க முடியாது. பகலில் உடலுக்கு போதுமான அசைவு இல்லாமல் இருந்தால், இரவில் படுத்த பிறகும் உடலில் ஒரு சுறுசுறுப்பு இருப்பது போலத் தோன்றலாம். இதற்காக தினமும் gym செல்ல வேண்டும் என்ற அவசியம் இல்லை. கொஞ்ச நேரம் நடைப்பயிற்சி செய்வது, வீட்டைச் சுத்தம் செய்வது, படிக்கட்டுகளில் நடப்பது, தோட்ட வேலை செய்வது என்று உங்களுக்கு வசதியான எந்த ஒரு செயலையும் செய்யலாம். முக்கியமாக, நாள் முழுவதும் உடலை ஒரே நிலையில் வைத்திருக்காமல், அவ்வப்போது எழுந்து நடப்பதும் கொஞ்சம் அசைவுடன் இருப்பதும் நல்ல பழக்கமாக இருக்கலாம்.

அதே நேரத்தில், தூங்குவதற்கு சற்று முன்பு கடுமையான உடற்பயிற்சியைச் செய்வதைவிட, பகல் நேரத்திலேயே உடலைச் சுறுசுறுப்பாக வைத்துக்கொள்வது பலருக்கு எளிதாக இருக்கும். தினமும் பெரிய மாற்றம் செய்ய வேண்டும் என்று நினைக்காமல், உங்கள் வழக்கமான நாளில் கொஞ்சம் கூடுதல் அசைவை சேர்த்துக்கொள்வதில் இருந்தே ஆரம்பிக்கலாம்.

9. மாலை நேரத்திற்குப் பிறகு காபி, டீயை கவனித்துப் பாருங்கள்

“ஒரு கப் டீ குடித்தால் என்ன ஆகப் போகிறது?” என்று நமக்குத் தோன்றலாம். மாலை நேரத்தில் வேலை முடித்துவிட்டு ஒரு கப் டீ குடிப்பது பலருக்கும் ஒரு சிறிய ஓய்வு மாதிரி இருக்கும். ஆனால் அதில் இருக்கும் caffeine சிலருக்கு இரவு தூக்கம் வருவதில் பாதிப்பை ஏற்படுத்தலாம். குறிப்பாக மாலை நேரத்திற்குப் பிறகு காபி அல்லது டீ குடிக்கும் பழக்கம் இருந்தால், அது உங்கள் தூக்கத்தில் ஏதாவது மாற்றத்தை ஏற்படுத்துகிறதா என்று கொஞ்சம் கவனித்துப் பாருங்கள். சில நாட்களுக்கு நீங்கள் எப்போது காபி அல்லது டீ குடிக்கிறீர்கள் என்பதையும், அந்த இரவு தூக்கம் எப்படி இருக்கிறது என்பதையும் நினைத்துப் பார்க்கலாம். எல்லோருடைய உடலும் caffeine-க்கு ஒரே மாதிரி பதிலளிக்காது. ஒருவருக்கு மாலையில் குடித்தாலும் எந்தப் பிரச்சனையும் இல்லாமல் இருக்கலாம்; இன்னொருவருக்கு அதே ஒரு கப் இரவில் தூக்கம் வராமல் செய்யலாம்.

10. ஒரு மோசமான இரவை அடுத்த இரவுக்கான பயமாக மாற்றாதீர்கள்

ஒரு இரவு சரியாக தூங்கவில்லை என்றால், மறுநாள் சோர்வாக இருப்பது இயல்பாக இருக்கலாம். ஆனால் அடுத்த இரவு படுக்கைக்குச் செல்லும்போதே, “நேற்றும் தூக்கம் வரவில்லை…” “இன்றும் வராதோ?” என்று பயப்பட ஆரம்பித்தால், தூக்கத்தைப் பற்றிய கவலை தனியாக ஒரு பிரச்சனையாக மாறிவிடலாம்.

ஒரு மோசமான இரவு என்றால் அது ஒரு மோசமான இரவு. அதை அடுத்த இரவுக்கான தீர்ப்பாக மாற்ற வேண்டிய அவசியமில்லை. நேற்று எப்படி இருந்ததோ, இன்றும் அப்படித்தான் இருக்க வேண்டும் என்று எந்த இரவுக்கும் விதி இல்லை.

இரவில் தூக்கம் வராமல் இருப்பது தொடர்ந்து நடந்தால்?

சில நாட்களில் தூக்கம் சரியாக வராமல் இருப்பது பெரிய விஷயமாக இருக்க வேண்டியதில்லை. வாழ்க்கையில் வேலைப் பளு, மனக்கவலை அல்லது வழக்கத்தில் ஏற்படும் மாற்றம் போன்ற காரணங்களால் சில இரவுகள் தூக்கம் பாதிக்கப்படலாம். ஆனால் தூக்கம் சரியாக வராத நிலை தொடர்ந்து பல வாரங்களாக நீடித்தால், அதை அப்படியே பழகிக்கொண்டு விட்டுவிடாமல் கொஞ்சம் கவனிக்க வேண்டியது அவசியம். குறிப்பாக பகல் நேரத்தில் சோர்வாக இருப்பது, வேலை அல்லது படிப்பில் கவனம் செலுத்த முடியாமல் போவது, எதற்கெடுத்தாலும் கவலையாக இருப்பது போன்ற மாற்றங்கள் தெரிந்தால், மருத்துவரிடம் அல்லது தகுதியான மனநல நிபுணரிடம் பேசிப் பார்ப்பது நல்லது.

தூக்கம் பாதிக்கப்படுவதற்கான காரணம் எல்லோருக்கும் ஒரே மாதிரியாக இருக்காது. ஒருவருக்கு மன அழுத்தமாக இருக்கலாம்; இன்னொருவருக்கு வேறு ஏதாவது காரணம் இருக்கலாம். அதனால் இணையத்தில் படித்த ஒரு குறிப்பை மட்டும் நம்பி நீண்ட நாட்கள் பிரச்சனையைத் தள்ளிப்போடாமல், தேவைப்பட்டால் சரியான உதவியைப் பெறுவது நல்லது. முக்கியமாக, உதவி கேட்பதை ஒரு பலவீனமாக நினைக்க வேண்டியதில்லை. சில விஷயங்களை மனதுக்குள்ளேயே வைத்துக்கொண்டு தனியாக சமாளிப்பதைவிட, நம்பிக்கையான ஒருவரிடம் அல்லது சரியான நிபுணரிடம் பேசுவது மனதுக்கு கொஞ்சம் நிம்மதியைத் தரலாம். சில நேரங்களில் நமக்கு உடனடியாக ஒரு தீர்வு கிடைக்க வேண்டிய அவசியமில்லை; நாம் அனுபவிப்பதை ஒருவர் புரிந்துகொண்டு கேட்பதே ஒரு நல்ல தொடக்கமாக இருக்கலாம்.

கடைசியில் ஒரு விஷயம்…

வாழ்க்கையில் எல்லாம் சரியாகிவிட்ட பிறகுதான் நிம்மதியாக தூங்க முடியும் என்று நாம் நினைத்துக்கொள்கிறோம்.

வேலை சரியாக இருக்க வேண்டும். பணம் பற்றிய கவலை இருக்கக்கூடாது. வீட்டில் எல்லோரும் சந்தோஷமாக இருக்க வேண்டும். நாளைக்கு என்ன நடக்கும் என்பதும் நமக்குத் தெரிந்திருக்க வேண்டும். இப்படி எல்லாமே சரியாக இருந்தால்தான் மனம் அமைதியாக இருக்கும் என்று நினைத்தால், அந்த நாள் வருவதற்காக நாம் இன்னும் எவ்வளவு காலம் காத்திருக்க வேண்டியிருக்கும் என்று தெரியாது. வாழ்க்கையில் எல்லாமே நம் விருப்பப்படிதான் நடக்க வேண்டும் என்று எதிர்பார்க்க முடியாது. சில நாட்களில் பிரச்சனைகள் இருக்கும். சில விஷயங்கள் நம்முடைய கட்டுப்பாட்டில் இருக்காது. ஆனாலும் அந்த எல்லா விஷயங்களும் சரியாகும் வரை நம்மால் நிம்மதியாக இருக்க முடியாது என்று நினைக்க வேண்டியதில்லை.

வாழ்க்கையில் எல்லா கேள்விகளுக்கும் பதில் கிடைத்த பிறகுதான் தூங்க வேண்டும் என்ற அவசியம் இல்லை. சில கேள்விகளுக்கு நாளை பதில் கிடைக்கலாம். சில பிரச்சனைகளுக்கு கொஞ்சம் நேரம் தேவைப்படலாம். அதனால் இன்று இரவு உங்கள் மனதில் ஆயிரம் விஷயங்கள் ஓடிக்கொண்டிருந்தாலும், அவற்றை எல்லாம் இன்றே சரி செய்ய வேண்டிய பொறுப்பு உங்களுக்கு இல்லை.

நாளைக்கு செய்ய வேண்டியதை நாளை பார்த்துக்கொள்ளலாம். இன்றைக்கு கொஞ்சம் நேரம் உங்களுக்காக விட்டுவையுங்கள். இன்று நடந்த எல்லாவற்றையும் மனதில் மீண்டும் மீண்டும் ஓட்டிப் பார்த்துக்கொண்டே இருக்க வேண்டிய அவசியமில்லை. சில விஷயங்களுக்கு பதில் கிடைக்க நேரம் தேவைப்படலாம். சில கவலைகள் காலையில் எழுந்த பிறகு அவ்வளவு பெரியதாகவே தெரியாமல் போகலாம். அதனால் இன்று இரவு எல்லாவற்றையும் சரி செய்ய வேண்டும் என்று உங்களை நீங்களே அழுத்திக்கொள்ளாதீர்கள்.

படுக்கையில் படுத்திருக்கும் அந்த நேரத்தில், “இதை இப்போதைக்கு விட்டுவிடலாம். நாளை பார்த்துக்கொள்ளலாம்” என்று மனதிடம் சொல்லிப் பாருங்கள். சில இரவுகளில் நமக்கு தேவைப்படுவது ஒரு தீர்வு அல்ல. கொஞ்சம் அமைதி. கொஞ்சம் ஓய்வு. நம்மை நாமே கொஞ்சம் அன்பாக நடத்திக்கொள்ளும் அந்த சிறிய அனுமதி.

நாளை மீண்டும் ஒரு புதிய நாள். இன்று அதற்காக உங்கள் மனதுக்கும் கொஞ்சம் ஓய்வு கொடுங்கள்.

மேலும் படிக்க: Positive Thinking மூலம் மனநலம் மற்றும் ஆரோக்கியத்தை பாதுகாப்பது எப்படி?